Distriktet.no

I  Sunnmørsposten onsdag 21. januar i år er der eit intervju med Agnar Aas , som er direktør  i Norges vassdrags- og  energidirektorat (NVE).  Intervjuet har overskrifta ”Skuldar på dårleg saksutreiing frå Statnett”.  Teksten  handlar om  konsesjonssøknaden  for  monsterlinja Fardal- Ørskog.  Kritikken av saksutgreiinga   kjem  ikkje heilt  uventa.  Døme:  I tilleggssøknaden av februar 2008 skriv Statnett  side 133 at  …Vi kjenner i dag konkrete planer for tre ulike større industriprosjekt i dette området  (Elkem Solar i  Svelgen, steinindustri på Vevring i Naustdal og Lutelandet/ elektrifisering av Gjøafeltet i Nordsjøen)…

På eit møte  hausten 2008, der  NVE og Statnett  var representerte, og  der  ordføraren i Bremanger  også var til stades, vart det sagt klårt frå om at for Svelgen sin del  så var dette  grov feilinformasjon.  Ordføraren kjende ikkje til slike konkrete planer.  Vi  kan  elles  vise til  eit brev om  saka frå Elkem Solar AS ved  HR-Manager Gunn-Marit  Eriksen:
”Vi holder nå på å ferdigstille vår nye Solarfabrikk i Kristiansand. Det har hele tiden vært en plan om videre ekspansjon i solmarkedet, men her er det ingen konkrete planer enda. Det har vært gjort en site-vurdering på aktuelle geografiske steder. Et av kriteriene har vært tilgang til kraft, kraftpriser og langsiktige avtaler på kjøp av kraft. Norge kommer ikke særlig godt ut på dette kriteriet, heller ikke på andre lønnsomhetskrav. Men for å understreke det: ingen beslutninger er tatt på valg av ny site.”

På det nemnde møtet hadde korkje Statnett eller NVE noko å svare på  avsløringa. I ettertid har eg ikkje fått melding om at feilen er retta. Har dei to store kanskje enno ikkje kontrollert  opplysningane?    Kva skal vi med høyringsmøte der ingen lyttar?  Er alle desse dyre møta haldne berre for  syns skuld?  Er det pro-forma-møte det er tale om? Bygdafolk  har god grunn til å kjenne seg haldne for narr av dette nedlatande spelet.

 

 

Korleis kan det ha seg at eit statleg selskap som Statnett i eit så viktig og dyrt dokument som denne konsesjonssøknaden, eit dokument som dreiar seg om  milliard-investeringar og store, øydeleggande  naturinngrep, skriv påstandar som ikkje er i samsvar med dei sanne tilhøva? Eg vel  likevel  å tru at dette ikkje er  overlagd  løgn. Kva slags motiv skulle  tilsette i  Statnett  ha  for å lyge? Er grunnlaget  for konsesjonssøknaden  verkeleg så tynt  at  her må  farast med usanning ? Eg trur heller at søknaden  er eit stykke unøyaktig  venstrehandsarbeid. Der er kort og godt for mykje slurv.  Men det  skulle då ikkje vere mogleg at godt betalte (og vel utdanna ?) tilsette i Statnett  utan vidare trur på lokalt  lausprat  om bygging av  ein ny, stor  fabrikk i Svelgen, for så å setje dette surret  ukontrollert på prent  i ein offentleg  søknad.  Statnett må  då vite  å kontrollere kjeldene sine!

Ei  mogleg forklaring om  klønete venstrehandsarbeid reiser nye spørsmål: Korleis er det med resten av  søknaden?  Er her mykje av same  svake  kvaliteten  andre stader også? Er sjølve forma på søknaden tendensiøs eller ikkje? Er dei  mange manipulerte bileta  i rapporten langt vakrare enn  det verkelegheita vil  vise, og  på den måten  sterkt  vill-leiande?  Er biletutvalet i søknaden  elles representativt og nøytralt? Eller kan det seiast å bagatellisere skadane? Er til dømes det som blir sagt om sjøkabling  i søknaden grundig nok  utreia?  

Ei skikkeleg avgjerd er  svært  avhengig av ein skikkeleg søknad. Vågar NVE  verkeleg  å legge til grunn  noko av det som Statnett skriv i denne søknaden? 

Dersom  ei  seriøs verksemd i næringslivet hadde fått levert ei utgreiing med punkt av ein slik påvist diskutabel kvalitet som vi finn i denne  konsesjonssøknaden, er det rimeleg å tru at heile utgreiinga  ville blitt kassert, og at nye og meir kompetente  fagfolk  i  eit anna firma hadde fått i oppgåve å lage ein ny og påliteleg  søknad.  Så får heller Statnett  ta seg tid  til å rydde opp på kammerset. Det er alltid trist å omplassere folk, men stundom er det naudsynt.  Det bør  vere uråd  for NVE  å handsame ein konsesjonssøknad  som  dokumentert  inneheld  grunnleggande  feil og manglar.  Vi får tru at NVE  held  eit hakk høgare kompetansenivå  i  viktige forvaltningssaker  enn det Statnett har lagt for dagen så langt i denne saka.

Roald Solheim